識人好過識字 邊種同事可以成為密友？ 熱門話題 - 識人好過識字 邊種同事可以成為密友？
有唔少人都話職場險惡，分唔清唔知邊個係真小人，邊個係假君子，經驗值唔夠嘅職場新人，分分鐘畀同事利用咗自己都唔知。不過，世事總有例外，有啲人可能就係咁好彩，喺職場上識到知心好友，平時唔單止可以約埋一齊行街、食飯，喺工作上仲可以互相照顧。唔知你身邊又有冇咁嘅同事呢？有嘅話，不妨多啲聯誼，話唔定你哋都可以成為密友！俗語有云：「識人好過識字」，想喺職場混得好有貴人支持絶對少不了。
有共同喜好
識朋友，最緊要係啱咀型！冇嘢好講嘅話，都唔方做到好朋友。所以，如果你同A同事咁啱大家都鍾意打網球，或是同樣喜歡某一套電影，甚至係鍾意同一個明星，這些共同喜好都可以係一種契機，等你哋有多啲共同話題之餘，平時仲可以約埋一齊打波、睇戲、睇演唱會等等。相處時間多咗，關係自然都close啲啦！持同樣的工作態度
所謂「近朱者赤，近墨者黑」，如果你同B同事都係工作認真、做事勤奮的人，而大家的工作目標和態度都好相近的話，咁真係恭喜你喇！因為你哋絕對有potential成為好友！話曬如果做嘢嘅態度和習慣都迥然不同的話，兩個人真係好難夾得埋。不過，唔係話工作懶散、做嘢馬虎的同事唔好，如果你都係咁嘅人，咁你哋兩個自然都夾得埋，只是若你想在工作上有進步，最好都係向積極認真的同事多多學習啦！互相幫助而不斤斤計較
有啲同事雖然會肯幫你，但就吓吓同你講人情，有時甚至會扮唔得閒拒絕你，遇着咁嘅同事，都係扮唔識好過，但係，如果係遇到一啲願意義不容辭去幫你，亦都唔會要你還人情嘅同事，你就一定要好好珍惜，當對方需要幫忙的時候，也要伸出援手，大家互相carry，過一排一定能成為密友！願意與你一起承擔過犯
好多人可以同你有福同享，但唔係個個都肯同你有難同當。工作上有咩差錯，好多人都係第一時間明哲保身，由你自己一個人啃曬佢。若你遇到一個願意同你一齊承擔過錯，一齊去作出補救的好同事，證明佢唔係當你同事咁簡單，當你係friend，先會肯捱義氣架咋！耐心教導你
工作上有不明白的地方，想請教同事的時候，一個二個通常就會即刻扮忙，唔得閒show你，或是求其膚衍吓你就算。所以，遇着一個有耐性去指導你的同事，咁你真係三生有幸，話曬唔係個個人都肯付出額外的時間同心機，去做一啲工作以外嘅事架嘛！
- 有好嘢會預埋你
人總係自私嘅，收到風份proposal改咗聽日dead；聽講公司要同人合併，可能要裁員；老細個秘書話個會改咗下午2點開，同你又唔係熟，點解要話埋畀你聽呢？睇你遲到出糗咪仲好笑，拿拿拿，一個好同事，就絕對唔會咁做；能成為密友的同事，有咩風都一定會通知埋你；老細請食下午茶，實會問埋你要咩；改咗時間開會，必定會同你單聲；甚至有好嘢食、好嘢玩、好嘢睇，都會記得預埋你嗰份，點都唔會要畀你一個人落單！
人際關係呢家嘢，真係好講緣份，與同事夾得埋、做到好朋友，固然係好事；但遇着啲傾唔埋嘅同事，都唔洗灰心，知心好友唔需要多，一、兩個就夠，反正「道不同，不相為謀」，做唔成friend，咪做返一般同事囉！要在職場上搵到密友，真係唔係咁容易架！